စစ်အစိုးရအား ဖိအားပေးရန် အာဆီယံကို ကရင်အမျိုးသမီးအဖွဲ့တောင်းဆို

စစ်အစိုးရအား ဖိအားပေးရန် အာဆီယံကို ကရင်အမျိုးသမီးအဖွဲ့တောင်းဆို

အရှေ့တောင်အာရှ နိုင်ငံများအသင်း (အာဆီယံ) အစည်းအဝေး ပြုလုပ်နေချိန်တွင် မြန်မာနိုင်ငံနှင့် ဒေသတွင်း လူ့အခွင့်အရေး အဖွဲ့များ၊ နိုင်ငံရေး အဖွဲ့များက အာဆီယံအဖွဲ့ကို မြန်မာစစ်အစိုးရအပေါ် ထိထိရောက်ရောက် ကိုင်တွယ်ရန် ဖိအားပေး တောင်းဆိုလိုက်သည်။














နော်ထူးဖော၊ ကရင်အမျိုးသမီး အစည်းအရုံး (ဓာတ်ပုံ-ဇာနည်ဝင်း/ဧရာဝတီ)


ထိုင်းနိုင်ငံ ဖူးကက်မြို့တွင် ဒေသတွင်း နိုင်ငံခြားရေး ဝန်ကြီးများ၊ အာဆီယံနှင့် ဆွေးနွေးဖက် နိုင်ငံများမှ ကိုယ်စား လှယ်များ စတင် အစည်းအဝေး ပြုလုပ်နေချိန်၌ ထိုသို့ တောင်းဆိုလိုက်ခြင်း ဖြစ်သည်။

၎င်းတို့က အရပ်သားများနှင့် အကျဉ်းကျ နိုင်ငံရေးသမားများအပေါ် ဆိုးဆိုးရွားရွား ဆက်ဆံနေသည့် စစ်အစိုးရ၏ လုပ်ရပ်များကို ထောက်ပြပြီး စစ်အစိုးရ၏ ဒီမိုကရေစီ ဖော်ဆောင်ရေးလုပ်ငန်းများကို မေးခွန်းထုတ်လိုက်သည်။


စစ်အစိုးရက ပြီးခဲ့သည့် ၁ဝ နှစ်အတွင်း ကျေးရွာပေါင်း ၃၂ဝဝ ထက်မကကို ဖျက်ဆီးခဲ့ပြီး၊ ယခင်လကလည်း ကရင်ပြည်နယ် အတွင်း ထိုးစစ်ကြောင့် အရပ်သား ထောင်ပေါင်းများစွာ အိုးအိမ်ပစ် ထွက်ပြေးခဲ့ရသည် ဟူသည့် အချက်များကိုလည်း ထောက်ပြကြသည်။

အာဆီယံက စစ်အစိုးရကို ပြတ်ပြတ်သားသား ကိုင်တွယ်ရန် ၎င်းတို့ လှုံ့ဆော်နေသည်ဟု ဖူးကက်မြို့၊ အာဆီယံ အစည်းအဝေးသို့ ရောက်ရှိနေသူ ကရင်တိုင်းရင်းသူတဦးက ပြောသည်။

“အာဆီယံဒေသတွင်းမှာ ရှိနေတဲ့ လူ့အခွင့်အရေး ချိုးဖောက်မှုတွေအတွက် တရားမျှတမှု မလုပ်ပေးနိုင်ဘူးဆိုရင် အာဆီယံ တခုလုံး အနေနဲ့ သူတို့ ရည်မှန်းချက်ကို ဘယ်လို ရောက်အောင် သွားမလဲ” ဟု ကရင်အမျိုးသမီး အစည်းအရုံးမှ စည်းရုံးရေးမှူးတဦး ဖြစ်သူ နော်ထူးဖောက ဧရာဝတီကို ပြောသည်။

ဤအတောအတွင်း လူ့အခွင့်အရေး အဖွဲ့များက အာဆီယံ လူ့အခွင့်အရေး ကော်မရှင်တရပ် ပေါ်ပေါက်ရေးကို လှုံ့ဆော်လျက် ရှိပြီး၊ ထိထိရောက်ရောက်၊ တာဝန်ရှိရှိ အရေးယူ ဆောင်ရွက်နိုင်သည့်၊ လွတ်လပ်သည့် ကော်မရှင် ဖြစ်စေလိုသည်ဟုလည်း တောင်းဆို၊ တိုက်တွန်းနေကြသည်။

အာဆီယံ လူ့အခွင့်အရေး ကော်မရှင်တရပ် ဖွဲ့စည်းရေးအတွက် ၂ဝဝ၇ ခုနှစ် အာဆီယံ နိုင်ငံခြားရေး ဝန်ကြီးများ အစည်းအဝေးတွင် သဘောတူညီမှု ရရှိခဲ့ပြီး ဖြစ်သည်။

မနက်ဖြန်တွင် အာဆီယံ ၁ဝ နိုင်ငံမှ နိုင်ငံခြားရေး ဝန်ကြီးများ ပါဝင်သည့် အစည်းအဝေး ပြုလုပ်မည်ဖြစ်ပြီး အာဆီယံ ဒေသ လူ့အခွင့်အရေး လုပ်ငန်းများ ဆောင်ရွက်ရေးအတွက် ကျွမ်းကျင်သူများနှင့် ဆွေးနွေးကြမည်ဖြစ်သည်။

ယခင် အာဆီယံ အစည်းအဝေးများနှင့် မတူသည့် အချက်မှာ လူ့အခွင့်အရေး လှုပ်ရှားသူများက အစည်းအဝေးကာလ အတွင်း ဆန္ဒပြ လှုံ့ဆော်မှုများကို မမြင်တွေ့ရသည့်အချက် ဖြစ်သည်။

ထိုင်းနိုင်ငံတွင် ဆန္ဒပြမှုများကြောင့် ယခင် အာဆီယံအစည်းအဝေးများ ရပ်ဆိုင်းခဲ့ရသည့်အတွက် ထိုင်းအစိုးရက ယခု အာဆီယံအစည်းအဝေး ပြုလုပ်နေစဉ် ဖူးကက်မြို့အတွင်း မည်သည့်နည်းနှင့်မျှ ဆန္ဒပြခြင်း မပြုနိုင်ရန် တင်းတင်းကျပ်ကျပ် တားမြစ်ထားသည်။

အာဆီယံအသင်း အစည်းအဝေး ကျင်းပသည့် နေရာသို့ အသင်း၏ အထွေထွေ အတွင်းရေးမှူးချုပ် ဆူရင် ပစ်ဆူဝန် ယမန်နေ့က ရောက်ရှိလာပြီး လုံခြုံရေး အစီအစဉ်များ အားလုံး ကောင်းမွန်လျက်ရှိကြောင်း၊ အစည်းအဝေးကို အနှောင့်အယှက်မရှိ ပြုလုပ်သွားနိုင်မည်ဖြစ်ကြောင်း အာမခံ ပြောကြားသွားသည်။

ဤ သတင်းကို ဧရာဝတီ သတင်းထောက် ဇာနည်ဝင်းက ထိုင်းနိုင်ငံ ဖူးကက် ဒေသမှ ရေးသားပေးပို့ ခြင်းဖြစ် သည်။